Дијабетес претставува хронично заболување кое настанува кога имаме зголемена вредност на шеќер (гликоза) во крвта. Гликозата во крвта е главниот извор на енергија, која доаѓа од храната која ја консумираме. Инсулинот е хормон, произведен од страна на панкреасот и тој помага во придвижувањето на гликозата од храната во клетките, каде се разложува и се добива енергија. Понекогаш, панкреасот не произведува доволна количина на инсулин или пак воопшто не произведува. Во овој случај, гликозата останува во крвта и не стигнува во клетките.
Постојат различни видови на дијабетес. Сите типови се комплексни и сериозни. Главните три типови се: дијабетес тип 1, дијабетес тип 2 и гестациски дијабетес. Овие типови ќе ги објаснам детално во наредниот пост.
Дијабетесот може да предизвика сериозни здравствени проблеми, како што се срцеви заболувања, слепило, откажување на бубрезите, ампутации на долните екстремитети и многу други. За жал, дијабетесот не се лечи, но луѓето можат да превземат мерки за контрола на нивото на шеќерот во крвта и да останат здрави.
Симптоми на дијабетес
Кај дијабетес тип 1, симптомите често се ненадејни и можат да бидат опасни по живот. Поради тоа, обично oвој тип се дијагностицира брзо. Во споредба со него, кај дијабетес тип 2, многу луѓе немаат никакви симптоми, додека други знаци може да се забележат како дел од “стареењето”.
Дел од знаците и симптомите се:
- Зголемено чувство на жед
- Често мокрење
- Зголемен апетит
- Необјаснето губење на телесна тежина;
- Замор
- Чувство на глад
- Чешање, кожни инфекции
- Заматен вид
- Необјаснето губење на тежината (тип 1)
- Постепено накачување на тежина (тип 2)
- Менување на расположението
- Главоболки
- Вртоглавици
- Грчеви во нозете
Затоа, многу е важно дијабетесот да биде навреме откриен и редовно да се контролира. Доколку редовно не се регулира, последиците може да бидат многу лоши, дури и фатални. Со редовна и нормална контрола, може да живееме нормален и среќен живот. доколку забележите некој од горенаведените симптоми, консултирајте доктор.
